Тормош – ул ижади ҡомар

Баймаҡ биләмә-ара үҙәк китапханаһында яҙыусы, журналист, Башҡортостандың мәғариф алдынғыһы Гөлнара Мостафинаның 50 йәшлек күркәм юбилейы айҡанлы “Тормош – ул ижади ҡомар” исемле ижад кисәһе үтте. Сарала баш ҡалабыҙ Өфөнән килгән абруйлы ҡунаҡтар: Башҡортостан Республикаһының Яҙыусылар берлеге рәйесе урынбаҫары, шағирә, журналист, драматург, Ш.Бабич исемендәге дәүләт йәштәр премияһы лауреаты, Башҡортостан Республикаһының атҡаҙанған мәҙәниәт хеҙмәткәре Тәнзилә Дәүләтбирҙина, «Ағиҙел» журналының баш мөхәррире, шағир, яҙыусы, драматург Мөнир Ҡунафин һәм журнал хеҙмәткәрҙәре: баш мөхәррир урынбаҫары, яҙыусы, шағир, журналист Әхмәр-Ғүмәр Үтәбай, журналдың яуаплы сәркәтибе Луиза Кирәева, бүлек мөхәррире, шағирә Гөлнара Хәлфетдинова, режиссер Дилә Мөхәмәтйәрова, шулай уҡ яҙыусының әсәһе Таңһылыу Ғәйзуллина, ауылдаштары һәм уҡытыусылары – Йәмилә Ғилманова-Йомағолова, Илдүсә Әминева, һеңлеһе Гөлсәсәк Ғүмәрова, уның ҡыҙы Камила, әхирәте Рәхилә Биктимерова, Билал ауылы китапханасыһы Райхана Булатова, һабаҡташтары Гөлнара Байрамғолова, Ишбикә Шәрипова, китапханасылар, Р.Түләк исемендәге “Йәнгүҙәй” әҙәби-ижад берекмәһе ағзалары, әҙәбиәт һөйөүселәр ҡатнашты. Сығыш яһаусылар барыһы ла Гөлнара Мостафинаны уҡыусы, класташ, журналист, яҙыусы, шәхес һәм ябай ҡатын-ҡыҙ булараҡ төрлө яҡтан асты, юбилейы менән тәбрикләне, әҙибәнең балалар әҙәбиәте өлкәһендәге талантын юғары баһаланы, артабан да ошо юҫыҡта уңыштар теләне.
Гөлнара Дамир ҡыҙы ижад юлының нисек башланыуы, ҡасандан балалар өсөн яҙа башлауы, бөгөнгө яҙыусы булып формалашыуында әсәһенең, уҡытыусыларының, ҡәләмдәштәренең роле һ.б. тураһында һөйләне, һүрәттәре менән таныштырҙы, киләсәккә пландары хаҡында ла һөйләп үтте. 4-се лицейҙың 3-сө Б класы уҡыусылары Гөлнара Мостафинаның “Сынығырға ваҡыт” әкиәтенән өҙөктө сәхнәләштерҙе (етәкселәре – Тойғонова Зөбәйҙә Әүхәҙи ҡыҙы). Баймаҡ биләмә-ара үҙәк китапханаһы директоры Зилә Мортазина китапханасылар исеменән юбилярға иҫтәлекле бүләк тапшырҙы.