Аҡйондоҙ һәм Аҡйегет

Сая рухлы, ижади ҡарашлы йәштәр араһында “Аҡйондоҙ һәм Аҡйегет” бәйгеһе аҙна башында Ярат һәм Сыңғыҙ ауылдарында үтте. Ярат ауылында ойошторолған төбәк бәйгеһендә Ярат, Әбделкәрим, Ҡыуат, Аҡморон, Ҡаратал, Йомаш, Йылым, Бөрйәнйылға, Ишмырҙа ауылдарынан береһенән-береһе матур, йәшлек, сафлыҡ бөркөлөп торған талантлы ҡыҙҙар-егеттәр ҡатнашты. Йәштәр үҙ көстәрен нәфис һүҙ һөйләүҙә, әҙиптең әҫәрҙәрендәге мөхәббәт геройҙары образында сығыш яһауҙа, вальс бейеүҙә һынаны. Шулай уҡ конкурсанттар Мостай Кәримдең үҙҙәре яратып уҡыған китабына буктрейлер әҙерләп алып килде. Һөҙөмтәлә, Ишмырҙа ауылы Аҡйондоҙо – Нурзилә Әфләтүнова һәм Аҡйегете – Айгиз Ишмырҙиндар беренсе урынға лайыҡ булды. Һәр ҡатнашыусыға иҫтәлекле бүләктәр һәм дипломдар тапшырылды.
Сыңғыҙҙа үткән бәйгелә Сыңғыҙ, Буранбай, Таулыҡай, Беренсе Этҡол, Мерәҫ, Ҡолсора ауылдарының Аҡйондоҙҙары һәм Аҡйегеттәре ҡатнашты. Был көндө Сыңғыҙ мәҙәниәт йорто сәхнәһендә ысын мәғәнәһендә йәшлек, саялыҡ, илаһилыҡ, сафлыҡ, мөхәббәт тантана итте. Йәштәр бер-береһенә ғашиҡ йәрҙәрҙе – мөхәббәт образдарын сағылдырҙы, күңелдәргә үтеп инерлек итеп Мостай Кәрим шиғырҙарын һөйләне, тамашасыларҙы һоҡландырып вальста өйөрөлдө. Төбәк бәйгеһендә беренсе урынды Беренсе Этҡолдан Хисмәтуллина Фидалиә һәм Байымов Аяз, Ҡолсоранан Мостафина Гөлиә һәм Байрас Ғафаровтар яуланы. Бәйге дауам итә. Бөгөн “Аҡйондоҙ һәм Аҡйегет” бәйгеһе ҡаланың 1-се мәктәбендә ҡала йәштәре араһында үтә. Фотоларҙы түбәндәге һылтанма буйынса ҡарағыҙ:
https://vk.com/album-36585846_268902289